“Paper” ti cu Mirang holh dekmak cun “catlap” tinak si. Nain Lai ngakchia holh cun “caku” henta.
“Tiger” ti cu American Mirang nih “Cakei” an ti, “Beer” an ti loh.
Cakei cu a hraang! A hraan caah sahrang kan ti. Daite’n a tlong komi ramsa seh a hmang. Saveh a seh. Sakhi a ttam. Innzuat sattil zong ei a hmang. Hliam cangmi cakei a hraang chin. Ttih nung chin!
Hlan deuh lio nai hrawng zong ahkhan, tupi pakhat ah cakei a hraang ciammam cu, saveh, sakhi, ngal, zawng, ngau hei ti luklak pawl cu an lo ko. An tupi ah um ngam loin kaadang tupi ah an zam, an i thup. A zaam kho lo ar, caw, naa hei ti luklak pawl cu an ei lengmang hna. Sathaw lawngte cu ei kaw, thau huar, mil lemluam in. Cakei thau, pawpi mil ah aa chuah ti si.
Voitkhat cu, a zaammi ramsa pawl chungin Vompi nih “Mah ti cun si kho lo, mah Cakei hi kan doh hna hau,” tiah Cakei hraang doh dingin a hrihhawh hna.
Ngal nih, “Kan dihlak kan i fonh lai, kan luh hnawh lai i, kan tei ko lai,” tiah thatho ngai in a hung dir. Cuti doh ding i an i timh cuahmah lioah, Zawng nih Cakei a huatnak kong a hun chim ciammam cu saram vialte an lung a lut tuk. An dihlak in Cakei an hua dih. An huat tuk nakah Cakei huat aa zuammi ko khi an lo cang. A hua kho deuh paoh nih a bawi deuh, an hruaitu dingah thim ding phun khin an hung um. Sakuh nih, “Cakei ka fih ning hi, ka fih lo… ka fih lo… ahcun ka chiat seh!” tiah hawi hnulei tthutdan cung i a ngut pah khin a hung au. An dihlak in ‘Haleluijah!’ an ti lo lawng khi si ko.
Cu ni thawk cun, ‘Cakei Huatnak Meeting’, Cakei Huatnak Kong Ceihhmai Ttinak’, ‘Cakei Huatnak Conference’ hei ti bantuk khin Cakei huatnak kong ceihding ah meeting phunphun, seminar phunphun, conference phunphun an kai ti si.
‘Huatnak Kong’ lawngte ceihhmai cang hraat ahcun, vanchiat ah, anmah le anmah zong an irem ti hna lo. An lungchungin i huat ziar hram an i thawk hna i a donghnak ah cun i huat rumro. I huat rumro khi an si ko. ‘Ngal hi cakei huatzia a thiam tuk i, a kan laar khanh tuk,’ tiah Saveh nih Sakhi sinah bia a tuuk bantuk in, Cenghngia zong nih Valah sinah, ‘Pu Vom hi zeiahdah aa rel hnga, amah ko khi maw Cakei a hua kho bikah aa rel hnga!” ati ve ti si.
Cuti an um a hmuh hna tikah, Zawng cu a lungre a thei hoi tthan. Khua aa ruat aa ruat i, adongh marawt ah “Ummm! Ka Theih Cang!” ati, a hawile sinah cun a va kal.
“Kha! Nan dihlak in ngai uh!” a hun ti hna i an dai dih ti si. “Cakei Huatnak Theory ka rak chuahmi kha, ka rak palhmi si,” tiah a khabe a hun idomh i, “Cakei doh dingah ‘latest theory’ ka hmuh cang!” tiah panh ngai khin a hun thanh hna. “Rak kan chim, rak kan chim!” tiah saram pawl cu an umnak tupi zong tlirh dih in an hung au ti si ai.
Zawng nih, “Hika kan umnak tupi hin Caku Cakei Mangtara kan ser hna lai i, kan tupi ah a tlongmi cakei kha a lang in kan tthih lai,” a hun ti, a cil duak a hun dolh ta. “Cun tah…cun tah…?” ti mit-au in an hun zoh ahkhin, “Cun, Caku Cakei a ttih lai i, a zaam te ko lai!” tiah izum taktak khin a bia a hun donghter cu, an tupi ah kut bengh thawng lawngte in a khat dih tthan. Sakuh nih “Halee..lui ….ah!” tiah thang taktak in a hung au taktak i, an dihlak in “A..mennn!” an ti viar ti si.
Cuvial in si chung rih seh luau! A peh kho nih peh khawh si hi muau
Mr. Critic