Thlacamnak dum, Mindat le Matupi lam meng 24 le falung 5 nak i tlang a zik ah rak phunmi vailamtah cu 24th July, 2010 ah a cozah tthithruainak in phur/ thluk a si cang. Hi vailamtah hi 7th April, 2008 ni ah cozah hnatlak-pi-nak he rak phunmi a si.
Vailamtah an phur lio hmanthlak le ca zong ka ca he ka rak thil chih. Lung a fak ko kan cozah nih a kan tuah-to-ning hi ruah tikah... afaak hringhran ko.
Thil sining hi ai thleng chin lengmang ko... ruah ah thinlung mitthli a luang ruahmah ko.
Ram ramkhat, biaknak pakhat le uknak pakhat hi an kan uktu cozah nih ai tlaihmi a hmuru taktak hi a si ko rua hi ta mu. Kan do hrimhrim hna a hau!
Zeitin dah ka do lai ti ai thei lomi hna kan caah, hi kahin Kan U, Van Biak Thang nih a chimmi ka rak ttial chih : Cucu, Aung San Suu Kyi nih a chimmi pakhat cu Dimukrasi hmuhnak dingah a hopaoh nih rian kan ngei cio a ti.
Mi tampi nih cun zeitin dah rian kan ngeih zeitindah kan ttuan khawh lai tiah khuaruahhar in an um men lai... sihmanhsehlaw, inn kan tthuthmun in email kan kuatmi, catlang pakhat kan ttialmi, kan pawng i a tthumi hna kawlram kong kan chimhmi, kan tthuthmun in kan ih lai ah thla kan cammi te hna zong kha kanmah umnak hmun cio in kan tuah khawhmi cio a si. Cucaah zeidah ka tuah khawh timi nangmah le nangmah naa ruah i na tuah khawhmi na zumh a si ahcun na caan vialte chungin minute pakhat pahnik na lak i kawlram caah, miphun caah minute pakhat rian na ttuan a si ahcun, cu cu kan ram caah rian ttuanmi pakhat a si.
Cucaah kan zapi tein hmunkhat ah kan kal a si ahcun kan duhmi dimukarasi, kan duhmi ram a phan khomi kan si caah kan umhmun cio in kan zapi te'n ttuan ding kha hi kahin nawl le fial kaan duhmi hna si.
Upatnak he
Heito
KL, Malaysia
